Долго време се шпекулираше, но сега е потврдено: претстојната коалициска влада на Германија ги откри плановите за поедноставување на условите за аплицирање за германско државјанство и за првпат да се овозможи двојно државјанство за граѓаните кои не се членки на ЕУ.
Аплицирањето за германско државјанство да биде поедноставно и полесно
Во средата (24.11.2021) Социјалдемократите (СПД), Зелените и Слободните демократи (ФДП) ги објавија деталите од нивниот коалициски договор, поставувајќи го патоказот за годините по Меркел. Покрај политиките за зголемување на минималната плата, намалување на возраста за гласање и легализирање на канабисот, договорот вклучува неколку параграфи од посебен интерес за странските државјани кои живеат и работат во Германија.
Во договорот се наведува дека намерата на коалицијата е „да го поедностави патот до германското државјанство“ и да го модернизира законот. Условот за престој – минималното време што некој треба да живее во Германија пред да се квалификува за натурализација – ќе се намали на пет години, или три години за лицата кои завршиле посебни мерки за интеграција.
Досега, минималниот услов за престој беше осум години за некој што не е во брак со германски државјанин. Ова може да се скрати на седум години со завршување на курс за интеграција или шест години со постигнување на ниво Б1 на германски јазик.
Двојното државјанство ќе биде дозволено за државјани кои не се членки на ЕУ
Исто така, конкретно се наведува дека законот ќе биде променет за да дозволи „поширок спектар за добивање на државјанство“, што сугерира дека на граѓаните кои не се членки на ЕУ за прв пат ќе им биде дозволено да се одлучат за двојно државјанство. Претходно, двојното државјанство беше дозволено само во одредени околности, првенствено резервирано за граѓаните од другите земји на ЕУ.
Коалицијата, исто така, сака да им олесни на таканаречените „гастарбајтери“ да се квалификуваат за натурализација. Оваа генерација работници дојде во Германија во текот на 1950-тите, 1960-тите и 1970-тите години, главно од Турција, за да го пополнат недостигот на работници во клучните индустрии. Многумина останаа во Германија, но честопати не ги исполнија условите за државјанство – особено условот за доволно познавање на германскиот јазик. Коалицијата сега сака да ја отстрани оваа бариера.
Извор: iamexpat
За повеќе информации и дискусии на вакви и други теми придружете ни се во групата Македонци во Германија.
